31 Mart. 11, 31

Atreus Caecilius cucurbitarum

sic illas quasi filios Thyestae

in partes lacerat secatque mille.

Gustu protinus has edes in ipso,

has prima feret alterave cena,

has cena tibi tertia reponet,

hinc seras epidipnidas parabit.

Hinc pistor fatuas facit placentas,

hinc et multiplices struit tabellas

et notas caryotidas theatris.

Hinc exit varium coco minutal,

ut lentem positam fabamque credas;

boletos imitatur et botellos,

et caudam cybii brevesque maenas.

Hinc cellarius experitur artes,

ut condat vario vafer sapore

in rutae folium Capelliana.

Sic inplet gabatas paropsidesque,

et leves scutulas cavasque lances.

Hoc lautum vocat, hoc putat venustum,

unum ponere ferculis tot assem.