66 LAIUS Hyg. fab. 66

1Laio Labdaci filio ab Apolline erat responsum de filii sui manu mortem ut caveret. Itaque Iocasta Menoecei filia uxor eius cum peperisset, iussit exponi.

2Hunc Periboea Polybi regis uxor cum vestem ad mare lavaret expositum sustulit; Polybo sciente, quod orbi erant liberis, pro suo educaverunt, eumque quod pedes transiectos haberet, Oedipum nominaverunt.