40 PASIPHAE Hyg. fab. 40

1Pasiphae Solis filia uxor Minois sacra deae Veneris per aliquot annos non fecerat. Ob id Venus amorem infandum illi obiecit, ut taurum quem +ipsa amabat alia+ amaret.

2In hoc Daedalus exsul cum venisset, petiit ab ea auxilium. Is ei vaccam ligneam fecit et verae vaccae corium induxit, in qua illa cum tauro concubuit; ex quo compressu Minotaurum peperit capite bubulo parte inferiore humana.

3Tunc Daedalus Minotauro labyrinthum inextricabili exitu fecit, in quo est conclusus.

4 Minos re cognita Daedalum in custodiam coniecit, at Pasiphae eum vinculis liberavit; itaque Daedalus pennas sibi et Icaro filio suo fecit et accommodavit, et inde avolarunt. Icarus altius volans, a sole cera calefacta, decidit in mare quod ex eo Icarium pelagus est appellatum. Daedalus pervolavit ad regem Cocalum in insulam Siciliam.

5Alii dicunt; Theseus cum Minotaurum occidit, Daedalum Athenas in patriam suam reduxit.