193 HARPALYCUS Hyg. fab. 193

1Harpalycus rex Amymneorum Thrax cum haberet filiam Harpalycen, amissa matre eius vaccarum equarumque eam uberibus nutrivit et crescentem armis exercuit, habiturus successorem regni sui postmodum; nec spes paternas puella decepit, nam tantum bellatrix euasit ut etiam saluti fuerit parenti.

2Nam revertens a Troia Neoptolemus cum expugnaret Harpalycum gravique eum vulnere affecisset, illa periturum patrem impetu facto conservavit, fugavitque hostem.

3Sed postea Harpalycus per seditionem civium interfectus est. Harpalyce graviter ferens patris mortem contulit se in silvas, ibique vastando iumentorum stabula, tandem concursu pastorum interiit.