36 Caes. Gall. 4, 36

1Eodem die legati ab hostibus missi ad Caesarem de pace venerunt. 2His Caesar numerum obsidum quem ante imperaverat duplicavit eosque in continentem adduci iussit, quod propinqua die aequinoctii infirmis navibus hiemi navigationem subiciendam non existimabat. 3Ipse idoneam tempestatem nactus paulo post mediam noctem naves solvit, 4quae omnes incolumes ad continentem pervenerunt; sed ex iis onerariae duae eosdem portus quos reliquae capere non potuerunt et paulo infra delatae sunt.